ဂ၀ံမျက်နှာဖုံး (ပထမပိုင်း)
တာတေတို့ အညာရွာတွေမှ နွေဦးပေါက်တာနဲ့ မီးကင်းစောင့်ကြရတာဗျ။ အရှေ့ပိုင်းကင်း ။ အနောက်ပိုင်းကင်း ။ တောင်ပိုင်းကင်း။ မြောက်ပိုင်းကင်း။ ဗဟိုကင်းဆိုပြီး ကင်းတဲတွေ ဆောက်ထားကြရတယ်။ အပိုင်းကင်းတဲတွေမှာတော့ တစ်ကင်း နှစ်ယောက်ပဲ ချတာဗျ။ ဗဟိုကင်းမှာတော့ လူကြီးပိုင်းတွေ ထိုင်တယ်။
တစ်ညလေးယောက် စောင့်ရတယ်။
အသက် (၆၀ )ကျော်ရင်တော့ ကင်းလွတ်တယ်ဗျ။
ကင်းမစောင့်ရတော့ဘူး။ ဒီစနစ်ကလေးကတော့
တာတေတို့ရွာရဲ့ ကင်းတွဲတဲ့ စနစ်ပေါ့ဗျာ။
တခြားရွာတွေမှာလည်း သူ့ဓလေ့နဲ့သူ
ရှိကြမှာပေါ့လေ။ နွေဆိုရင်တော့ ကင်းတဲတွေမှာ
နှစ်ယောက် စောင့်တယ် ဆိုပေမယ့် အိုက်လို့ ပူလို့
အိပ်မရတဲ့သူတွေလည်း ကင်းတဲမှာ
သွားထိုင်ပြီး စကားပြောကြနဲ့
ကင်းတဲလေးတွေဟာ ကျုပ်တို့အညာသားတွေရဲ့
ဗဟုသုတ ရှာမှီးတဲ့ စုရပ်ကလေးတစ်ခုပဲဗျ။
ရေနွေးအိုးကျိုတဲ့လူက ကျိုရတယ်ဗျ။
မီးဖိုကိုတော့ သေသေချာချာ သွပ်ပြားခွေထိုးပြီး
ကျိုရတာဗျ။ ပြီးရင် မီးကြွင်းမကျန်အောင်
ငြိမ်းကြရတယ်။ တချို့ရွာမှာ မီးကင်းကစပြီး
မီးလောင်တဲ့ သာဓကတွေလည်း ရှိဖူးတာကိုးဗျ။
အညာဒေသရဲ့ အကြီးမားဆုံး ရန်သူ မီးပဲဗျ။
လူခိုးရင် ကျန်နိုင်သေးပေမယ့် မီးခိုးရင်တော့
တက်တက်ကို ပြောင်တာဗျို့။ ခင်ဗျားသိတဲ့အတိုင်း
ကျုပ်တို့အညာမှာက ရေမှ မရှိတာ။
မီးလောင်ရင် သဲနဲ့ပက် ။ အိမ်ဖျက်ချရတာဗျ။
ဒီကြားထဲ လေပင့်လို့ကတော့ ကျောကော့ပြီး
ပြေးဖို့သာ ပြင်ပေါ့ဗျာ။
ဒါပေမယ့် လောင်ခဲပါတယ်။ ကြောက်တော့
ဂရုစိုက်ကြတာလေဗျာ။ အရေးကြီးတာကတော့
သတိပဲဗျ။ သတိရှိနေသမျှ မီးဘေးမရှိနိုင်ပါဘူးဗျာ။
"ကိုကြီးတာတေ ညကျရင် ကင်းတဲဘက်ကလေး
ဘာလေး လျှောက်ခဲ့ပါဦးဗျ။ စကားလေးဘာလေး
ပြောရတာပေါ့"
ကျောက်ခဲဗျ။ လှည်းမောင်းပြီး ပြန်လာတာ။
ဘယ်ကလာတာမှန်းတော့ မသိဘူး။
ဝိုင်းရှေ့ကနေ လှည်းမောင်းရင်း အော်ပြောသွားတာဗျ။
"အေး အေး ။ လာခဲ့မယ်ဟေ့ ကျောက်ခဲ"
ကျုပ်က ပြန်ပြောလိုက်တော့ ဒီကောင်
လှည်းဆက်မောင်းသွားတယ်
"ကျောက်ခဲ ဘယ်ကပြန်လာတာတုံး
လှည်းကြီးမောင်းလို့ "
အမေက ကျုပ်ကို လှမ်းပြောတာဗျ။
"မသိဘူး အမေရ။ ကျုပ်အထင်တော့ ဒီကောင်တွေ
သားအဖ မြို့တက်ပြီး နှမ်းသွားရောင်းတာထင်တယ်။
မြို့ပွဲရုံက ဈေးနဲ့ ဒီဆင်းဝယ်တဲ့ဈေးက အခုရက်မှာ
နည်းနည်းကွာနေတယ် ပြောကြတယ်"
ဟေ …ဟုတ်လား ။ ဟုတ်ချင်ဟုတ်မှ တာတေရဲ့
တို့ရွာကို နှမ်းတွေ ပဲတွေ ဆင်းဝယ်တဲ့
ပွဲစားငထွန်းက လောဘ သိပ်ကြီးတယ်လို့
လူတိုင်းပြောကြတာ ။ ဒီလိုမျိုး ဈေးကိုခွာဝယ်။
အလေးတင်းတောင်း မမှန်မကန် ချင်ယူလုပ်လို့ကတော့
ဘယ်မှာ ရေရှည်ခံရမှာတုံး ။ ငါတို့ရွာတွေက
မြို့နဲ့ အလှမ်းဝေးတာမှ မဟုတ်တာ
မြို့တက်ပြီးရောင်းလိုက်မှာပေါ့ဟဲ့"
"အမေပြောတာ ဟုတ်တာပေါ့။
ပွဲစားက စိတ်ဓါတ်မကောင်းရင် ရေရှည်လုပ်စားလို့
မရတော့ပါဘူးဗျာ"
"အမေပြောတာ ဟုတ်တာပေါ့။
ပွဲစားက စိတ်ဓါတ်မကောင်းရင် ရေရှည်လုပ်စားလို့
မရပါဘူးဗျာ"
"အေးလေ အရင် တို့ရွာမှာ ပဲလာလာဝယ်နေတဲ့
စိန်သောင်းဆိုတဲ့ကောင် ဘယ်မှာ လာလို့ရတော့လို့တုံး
လူတွေက သူ့ဆိုရင် ဘယ်သူမှကို မရောင်းတော့တာ
လာမေးရင် မရောင်းသေးပါဘူးလို့ချည်း ပြောလွှတ်ကြတာ"
ညရှစ်နာရီလောက်ရောက်တော့ ရွာလယ်ပိုင်းကင်းတဲကို
ကျုပ်ရောက်ခဲ့တယ်။ ကျောက်ခဲရော ။ သံမဏိရော။
မျက်ပြူးရော ။ တိုးလှရော အောင်သိန်းရောဗျ။
"ဟာ တာတေ လာကွ သူငယ်ချင်း"
အောင်သိန်းက ကျုပ်ကို ကင်းတဲပေါ်ကနေ
လှမ်းခေါ်တယ်ဗျ။
"ဒီည ဘယ်သူ့ကင်းတုံး"
"ငါနဲ့ တိုးလှ အလှည့်လေကွာ"
ကျုပ်တို့ ရွာက ကင်းတဲတွေက ခြေတံရှည်တွေဗျ။
လှေကားနဲ့ တက်ရတာ။
"ကိုကြီးတာတေ လာဗျ။ ဒီဘက်ကို"
ကျောက်ခဲက ကျုပ်ကို ထိုင်ဖို့နေရာ ပေးတယ်။
ကျုပ်က ဖျာကြမ်းခင်းထားတဲ့ အပေါ်မှာ
ဝင်ထိုင်လိုက်ပြီး အင်္ကျီအိတ်ထောင်ထဲက
နဂါးဆေးပေါ့လိပ်ကလေးထုတ်ပြီး မီးညှိလိုက်တယ်။
ဆေးပေါ့လိပ်ကလေး နှစ်ဖွာ သုံးဖွာလောက် ဖွာရုံရှိသေးဗျာ။
"ဟေ့ …ဒီည ဘယ်သူ့အလှည့်တုံးကွ"
"ဟား …ဒါ ဦးချက်ကြီးပဲ"
ကျောက်ခဲက ပြောလိုက်တာဗျ။ ဒါနဲ့ တိုးလှက
ပြောလိုက်တယ်။
"လေးလေးချက်ကြီး ။ ကျုပ်နဲ့ အောင်သိန်းအတွဲဗျ"
"ဟေ …ကျုပ်က ဘယ်သူတုံး"
"တိုးလှလေ တိုးလှ"
"သြော် …အေး အေး။ နိုးနိုးကြားကြား စောင့်ကြနော်။
နှစ်ယောက်စလုံး အိပ်မနေနဲ့ ။ တစ်ယောက်တစ်လှည့်စီ အိပ်ကြ"
"လေးလေးချက်ကြီး တက်ခဲ့ဦးလေဗျာ။
စကားလေးဘာလေး ပြောရအောင်"
"ဟ …ဒါ ဘယ်သူတုံး ။ တာတေလား"
"ဟုတ်တယ်လေ လေးလေးချက်ကြီးရ ။ တက်ခဲ့လေ"
"ဟာ …တာတေပါ ရောက်နေရင်တော့ တက်ခဲ့ရမှာပေါ့ကွာ။
တာတေရဲ့ အတွေ့အကြုံတွေကို နားမထောင်ရတာ ကြာပေါ့"
ပြောပြောဆိုဆိုနဲ့ လေးလေးချက်ကြီးက ကင်းတဲပေါ်
တက်လာရောဗျို့။
"ဟာ လေးလေးချက်ကြီးတို့ကတော့ဗျာ။
လူမရောက်ခင်ကတည်းက အနံ့က ကြိုရောက်နေပြီ"
တိုးလှက လေးလေးချက်ကြီးကို နောက်လိုက်တာဗျ။
"ဟကောင်တွေရ ။ ဘာနံ့တုံးဟ"
"ဘာနံ့ရမတုံး ။ ထန်းရည်နံ့လေဗျာ"
"ဟား ဟား ဟား ဟား ညနေက ပြည်သိန်း လာခေါ်လို့
ထန်းတော ပါသွားတာဟေ့ ။ ဟိုရောက်တော့ နှစ်ယောက်သား
စကားတပြောပြောနဲ့ ချလိုက်ကြတာ မိုးကိုချုပ်ရောဟေ့"
"ဘယ်ပြည်သိန်းတုံး လေးလေးရဲ့ "
အောင်သိန်းက မေးလိုက်တာဗျ။ ဟုတ်တော့ ဟုတ်တယ်ဗျ။
ကျုပ်တို့ ထနောင်းကုန်းမှာက ပြည်သိန်း နှစ်သိန်းရှိတယ်လေဗျာ။ ဦးမြဒင်သား ပြည်သိန်းနှင့် အနောက်ပိုင်းက ကိုပြည်သိန်းလေ။ အနောက်ပိုင်းက ကိုပြည်သိန်းက အကြွားသိပ်သန်တာဗျ။ ဒါကြောင့် သူ့ကို ကျုပ်တို့ရွာသားတွေက လေကြွားပြည်သိန်းလို့ ခေါ်တယ်
"တာတေ မင်းကိုတော့ ပြည်သိန်းက လွှတ်ချီးမွမ်းတာကွ။
သူ့အစ်ကိုကျော်သိန်း တစ္ဆေကိုက်ခံရတုန်းက အနာကြီး
ဖြစ်နေတာ ဘာလုပ်မှ မပျောက်ဘူးဆိုပဲ။ အဲဒါ တာတေ
လုပ်ပေးလို့ ပျောက်သွားတာဗျာ ဆိုပီး မကြာ မကြာ
ပြောတာကွ။ သူ့အစ်ကို ကျော်သိန်းကြီးကလည်း
သဘောကောင်းပါတယ်ကွ။ အေး …သူ့အဖေ
ဘိုးမြဒင်ကတော့ လူရွှင်တော်စကားနဲ့ ပြောရရင်
တော်တော်လေး ဖင်ခေါင်းစတားတာပေါ့"
"ဟား ဟား ဟား ဟား"
ကျောက်ခဲတို့ သံမဏိတို့က လေးလေးချက်ကြီး
ပြောတာကို ရယ်ကြရောဗျို့။
"လေးလေးကလည်းဗျာ။
ဘိုးမြဒင် ဖင်ခေါင်းစတားတာ
လိပ်ခေါင်းရှိလို့ နေမှာပေါ့ဗျ"
ကျုပ်က ဝင်ပြီး နောက်လိုက်တာဗျို့။
"ဟား ဟား ဟား ဟား"
ကျောက်ခဲတို့အုပ်စု ရယ်ကြပြန်ရောဗျာ။
ကင်းတဲ လေးက အခုမှ အသက်ဝင်လာတာပေါ့ဗျာ။
"ဟာ ကိုကြီးတာတေက တော်တော်လျှိုတာပဲဗျာ
ကိုကျော်သိန်းကြီး တစ္ဆေကိုက်ခံရတာကို တစ်ခါမှ
ပြောမပြဖူးဘူး"
သံမဏိက ပြောတာဗျို့။အင်မတန်စကားနည်းတဲ့ကောင်က
ပြောတာဗျ။
"ဟာကွ သံမဏိကလည်း သူတို့တွေက လူချမ်းသာတွေကွ
ဒီအကြောင်းကို ဘယ်သူမှ မသိချင်လို့ ငါက
မပြောဘဲ ထားတာပါ"
"ကိုကြီးတာတေသာ အုပ်ထားတာ။
သူ့ညီ ကိုပြည်သိန်းကြီးကတောင်
လေးလေးချက်ကြီးကို ပြောလိုက်သေးတယ်"
ကျောက်ခဲကလည်း ကျုပ်ကို စကားနာထိုးတယ်ဗျ။
"ဟ ကျောက်ခဲရ။ ကိုပြည်သိန်းပြောတာက
ကိစ္စမရှိဘူးလေကွာ။ငါပြောလို့ ဒီသတင်းပွသွားတယ်ဆိုရင်
ဘယ်ကောင်းမှာတုံး ။ နို့နေပါဦး လေးလေးချက်ကြီးရဲ့။
အဲဒီကိုကြီးကျော်သိန်းရော နေထိုင်ကောင်းရဲ့လား။
ကျုပ်နဲ့ မဆုံတာကြာပေါ့"
"အောင်မလေး တာတေရာ ကောင်းလိုက်တာမှ
ဝဖီးနေတာကွ။ အေး …ပြောရဦးမယ်။
ကျော်သိန်းက အစတုန်းက ပိန်ညှောင့်ညှောင့်မဟုတ်လား။
တစ္ဆေကိုက်ခံရပြီးမှကို ဝဖီးလာတာဟေ့"
"ဟား ဟား ဟား ဟား တစ္ဆေက
အားဆေးထိုးပေးလိုက်တာလားမှ
မသိတာ လေးလေးချက်ကြီးရဲ့"
"ကျောက်ခဲတို့ အုပ်စုက ရယ်ကြပြန်ရောဗျို့။
"ကျုပ်ကို မဖဲဝါ ပြောတာကတော့ ကျောက်တလားချောင်းက
အဲဒီတစ္ဆေက သဘောတော်တော်ကောင်းတာတဲ့ဗျ။
ကိုကျော်သိန်းက စပြီးရန်မူလို့ ဟိုက ကိုက်လိုက်တာဆိုပဲ"
"ဟေ ဟုတ်လား တာတေ။ ကျော်သိန်းက တစ္ဆေကို
ဘာသွားလုပ်လိုက်လို့တုံး"
လေးလေးချက်ကြီးက မျက်လုံးပြူးပြီး ကျုပ်ကို
မေးတာဗျို့။ ကျုပ်လည်း ဘယ်လိုမှ ရှောင်လို့မရတော့
ပြောတော့တာပေါ့ဗျာ။
"ဒီလိုဗျို့။ဘိုးမြဒင်တို့အိမ်မှာ မြင်းကြီးနှစ်ကောင်ရှိတယ်မို့လား
အုန်းခွံရောင်ကြီးရဲ့ နာမည်က တိမ်ညိုတဲ့ဗျ။ကိုကျော်သိန်းက
သူ့အဖေခိုင်းလို့ တိမ်ညိုကြီးကို စီးပြီး ဂုံးဒေါင်ဘက်မှာ
အကြွေးသွားတောင်းတာတဲ့ဗျ။ အဲဒီကျောက်တလားချောင်းက တစ္ဆေကလည်း လွှတ်မြင်းစီးချင်တာဗျ။
ညနေစောင်းမှာ ကိုကျော်သိန်းက ကျောက်တလားချောင်းကို
တိမ်ညိုကြီးနဲ့ ဖြတ်ကူးတော့ တစ္ဆေက မြင်းပေါ်ခုန်တက်ပြီး
ကိုကျော်သိန်းနောက်က စီးတာတဲ့ဗျ။ သူ့လှည့်ကြည့်တော့
တစ္ဆေက သူ့ကို သွားအကျဲသားနဲ့ ရယ်ပြတယ်တဲ့ဗျို့။
တစ္ဆေက ပုဆိုးတိုတိုနဲ့ဆိုပဲ။တစ်ကိုယ်လုံး မဲနက်နေတာတဲ့။
အဲဒီမှာ ကိုကျော်သိန်းက ဒေါသဖြစ်သွားပြီး ရုပ်ကိုက
စပ်ဖြီးဖြီးနဲ့ဆိုပြီး တစ္ဆေကို တံတောင်နဲ့ တွက်ချသတဲ့ဗျို့။
တစ္ဆေက ပြုတ်မကျဘဲ သူ့လက်မောင်းကို ကိုက်လိုက်ရောတဲ့ဗျာ။
တစ္ဆေကိုက်တဲ့နေရာကနေ အနာကြီးဖြစ်လာပြီး
ဟိုဆေး ဒီဆေးတွေနဲ့ကု မြို့က ဆရာဝန်နဲ့ကု
ဘာလုပ်လို့မှ မရဘဲ လက်ကြီးယောင်ကိုင်းပြီး
ကိုက်လို့ အော်နေရတာဗျို့။ နောက်ဆုံး ကျုပ်ဆီ ရောက်လာရော"
"မင်းကို ဘယ်သူ လာခေါ်တုံး။ ဘိုးမြဒင်လား"
တိုးလှက ကျုပ်ကို မေးတာဗျ။ကျုပ်က ခေါင်းခါပြလိုက်ပြီး…
"မဟုတ်ဘူးကွ တိုးလှရ။ ကိုပြည်သိန်းကြီး လာခေါ်တာ"
"သြော် …ဒီတော့ မင်း ဘာလုပ်ပေးလိုက်တုံး"
အောင်သိန်းက ဝင်မေးပြန်ရောဗျို့။
ဒီအကြောင်းကို ဒီကောင်တွေ ခုမှ သိကြတာလေဗျာ။
"ငါကတော့ ဘာလုပ်ပေးတတ်မှာတုံး အောင်သိန်းရာ။
မဖဲဝါ မေးကြည့်ရတာပေါ့ ။ မဖဲဝါက တစ္ဆေကိုက်တာ
ပေါ့သေးသေး ထင်လို့လား။ ကြာရင် လက်ပါဖြတ်ပစ်ရလိမ့်မယ် ကျောက်တလားချောင်းက ကိုက်လိုက်တဲ့ တစ္ဆေဆီကို
သွားပြီး ကျော်သိန်းအစား နင်တောင်းပန်ပေးလိုက် တာတေ။
ပြီးတော့ တစ္ဆေကျေနပ်အောင် ထမင်းနဲ့ အမဲသားဟင်း
ကျွေးလိုက်။ သူ ဆေးပေးလိုက်လိမ့်မယ်။ အဲဒီဆေးကိုလ်ိမ်းရင် ပျောက်မယ်ဆိုလို့ ကျုပ် အားလုံးလိုက်လုပ်ပေးရတာပေါ့
လေးလေးချက်ကြီးရာ"
ဒီတော့ လေးလေးချက်ကြီးက ကျုပ်ကို မျက်လုံးပြူးကြီးနဲ့
ကြည့်ပြီး မေးပြန်ရောဗျ။
"နေပါဦး တာတေရ ။ မင်းက တစ္ဆေကို ဘယ်နေရာမှာ
ခေါ်တွေ့တာတုံး"
"ဟာ …လေးလေးကလည်း ကျုပ်က တစ္ဆေကို
ခေါ်တွေ့လို့ ဘယ်ရမှာတုံးဗျ။ ဘိုးမြဒင်ရဲ့မြင်းကြီး
တိမ်ညိုကို စီးသွားပြီး ကိုကြီးကျော်သိန်း လုပ်သလို
ကျောက်တလားချောင်းကို မြင်းနဲ့ ဖြတ်ကူးရတာပေါ့ဗျ။
ကိုကြီးကျော်သိန်း ကူးတဲ့နေရာကို မေးသွားပြီး
သူကူးတဲ့အချိန်မှာပဲ သူကူးတဲ့နေရာက ကူးရတာပေါ့ဗျ"
"ဒီတော့ တစ္ဆေက လာရောလား"
လေးလေးချက်ကြီးကိုယ်တိုင် စိတ်ဝင်တစား
မေးနေတာဗျို့။
"မြင်းပေါ်ခုန်တက်ပြီး ကျုပ်နောက်ကနေ စီးတော့တာပေါ့ဗျာ။
ကျုပ်လှည့်ကြည့်လိုက်တော့ ပုဆိုးတိုတိုကြီး ဝတ်လို့ဗျ။
တစ်ကိုယ်လုံး မဲနက်နေပြီး သွားအကျဲသားနဲ့
ကျုပ်ကို ရယ်ပြနေတယ်ဗျ။ ဒီမှာတင် ကျုပ်က
သူ့ကို ကိုကျော်သိန်းအကြောင်းပြောပြပြီး
ကိုကျော်သိန်းကိုယ်စား တောင်းပန်ရတော့တာပေါ့ဗျာ။
ပြီးတော့ သူစားဖို့ အမဲသားဟင်းနဲ့ ထမင်းယူလာတဲ့အကြောင်း
ပြောပြီး အနာလိမ်းဖို့ ဆေးတောင်းရတာပေါ့ဗျာ။
တစ္ဆေက ဆေးသိပ်မပေးချင်ဘူးဗျ။ ကျုပ်က မဖဲဝါ
လွှတ်လိုက်တာလို့ ပြောလိုက်တော့မှ တစ္ဆေက
ခေါင်းညိတ်ပြီး ဆေးသွားယူပေးတာဗျ။
သူထမင်းစားနေတုန်း ကျုပ်လည်း တိမ်ညိုကြီးနဲ့
ရွာအရောက် လစ်ခဲ့ရတာပေါ့ လေးလေးရာ"
"နေပါဦးကွ တာတေရ။ တစ္ဆေက ဘာဆေးများ
ပေးလိုက်တာတုံးကွ"
"ကျောက်အိုးပုတ်ကလေးတွေဗျ။အထဲမှာ လှုပ်ကြည့်ရင်
အရည်တွေ ရှိတယ်။ အိမ်ရောက်တော့
အဲဒီကျောက်အိုးပုတ်တွေထဲက ရေကို ခဲရာခဲဆစ်
ထုတ်ယူပြီး ကြက်တောင်လေးနဲ့ ကိုကြီးကျော်သိန်းအနာကို
လိမ်းပေးရတယ်။ ဒီလိုညဘက်မှာ ကျုပ်လိမ်းပေးခဲ့တာ။
မနက်ဆိုရင်ပဲ ကိုကြီးကျော်သိန်း ကျုပ်အိမ်ကို
ရောက်လာတာဗျ။သူ့လက်က လုံးဝကောင်းသွားပြီ"
"ဟာ တယ်ဟုတ်ပါလား သူဆေးနဲ့သူတော့
ဟုတ်သားလားဟ"
ကျုပ်ပြောတာကို အားလုံးက စိတ်ဝင်တစားနဲ့
နားထောင်နေကြတာဗျို့။
"နေဦးကွ တာတေရ ။ ဒီကျောက်အိုးပုတ်တွေကို
တစ္ဆေက ဘယ်မှာသွားယူတာတုံးကွ"
လေးလေးချက်ကြီးက ကျုပ်ကို မေးပြန်ရောဗျ။
"ကျောက်တလားချောင်းစပ်က တောထဲကို
ဝင်သွားတာပဲ လေးလေးရ။ ဘယ်မှာသွားယူတယ်တော့
ကျုပ်လည်း မသိဘူးဗျ"
ကျုပ်က နဂါးဆေးပေါ့လိပ်ကလေးကို မီးညှိပြီး
ဖွာတယ်။ အိတ်ထောင်ထဲမှာ ပါလာတဲ့ တစ်လိပ်ကို
လေးလေးချက်ကြီးကို ပေးလိုက်တယ်။ လေးလေးချက်ကြီးလည်း
ဆေးလိပ်ဖွာရင်း တွေးနေတယ်။ ကျန်တဲ့ကောင်တွေလည်း
ငြိမ်ပြီး တွေးနေပုံပဲဗျ။
"သြော်…ကျော်သိန်း ။ ကျော်သိန်း ။ တစ္ဆေကို
တံတောင်နဲ့ မြင်းပေါ်က တွတ်ချဆိုပဲ။
တော်သေးတာပေါ့။တစ္ဆေက ကိုက်ရုံကိုက်သွားလို့
ဂုတ်သာချိုးပစ်ခဲ့ရင်တော့ မလွယ်ဘူးဟေ့"
"ဒေါင် ဒေါင် ဒေါင် ဒေါင် ဒေါင်"
"ဟဲ့ …ဘာသံတုံး။ ဟင် သံချောင်းခေါက်တဲ့အသံပါလား"
လေးလေးချက်ကြီးက အလန့်တကြား ပြောလိုက်တာဗျ။
"မီးများလောင်သလား ။ ဒါ ဘယ်ကင်းက ခေါက်တာတုံး"
"တောင်ပိုင်းကင်းက ခေါက်တာ လေးလေး"
တိုးလှက ပြောလိုက်တယ်။
"ကြည့်ကြစမ်းဟေ့။မီးခိုးတွေ မီးရောင်တွေ မြင်သလား"
"ဘာမှတော့ မမြင်ဘူး။လေးလေးရဲ့"
"ဒေါင် ဒေါင် ဒေါင် ဒေါင်"
"ဟော အရှေ့ပိုင်း အနောက်ပိုင်း မြောက်ပိုင်းတွေကပါ
သံချောင်းတွေ ခေါက်ကုန်ပြီဟေ့။မင်းတို့လည်း
ခေါက်တော့လေ"
ကျုပ်က တိုးလှကို သံချောင်းခေါက်ခိုင်းလိုက်တယ်။
"ဒေါင် ဒေါင် ဒေါင် ဒေါင် ဒေါင်"
တိုးလှလည်း သံချောင်းခေါက်ပြန်ပြီဗျို့။
တစ်ရွာလုံး သံချောင်းခေါက်သံတွေ ညံကုန်ပြီပေါ့ဗျာ။
လူတွေလည်း လမ်းပေါ်ထွက်လာကြတယ်။
"ဟေ ဘာဖြစ်တာတုံး ။ မီးလောင်တာလား"
"မသိသေးဘူး ဘထွေးရ။တောင်ပိုင်းက စခေါက်တာ
မီးခိုးတွေ ဘာတွေတော့ မတွေ့ဘူးဗျ"
ကျောက်ခဲရယ် သံမဏိရယ် မျက်ပြူးရယ်ကတော့
ကင်းတဲပေါ်ကနေ ပြေးဆင်းပြီး တောင်ပိုင်းကို
သွားကြတယ်။လေးလေးချက်ကြီးနဲ့ ကျုပ်လည်း
သွားရတော့တာပေါ့ဗျာ။ကျုပ်တို့ရောက်တော့
တောင်ပိုင်းကင်းမှာ လူတောင် တော်တော်များနေပြီဗျ။
"ဟေ့ …ဘာဖြစ်ကြတာတုံး"
ဆယ်အိမ်ခေါင်း ကိုကံသာက အော်ကျယ် အော်ကျယ်နဲ့
မေးနေတာဗျ။
"အရူးမဗျ။ ဆံပင်ဖားလျားကြီးချလို့ ။ကိုယ်တုံးလုံးနဲ့ဗျ။
မျက်နှာကို လက်ဝါးနှစ်ဖက်နဲ့အုပ်ပြီး ရပ်နေတာ။
ဟီး ဟီး ဟီး ဟီး ဟီး လို့ ရယ်သံကြားလို့ အောင်ဘုနဲ့
ငတိုးက ဓါတ်မီးနဲ့ ထိုးကြည့်ကြတာ"
"ဒီည ဒီကင်းမှာကျတာ အောင်ဘုနဲ့ ငတိုးလား"
ကိုကံသာက ခပ်ကျယ်ကျယ် မေးလိုက်တယ်
သူက ဆယ်အိမ်ခေါင်းလေဗျာ။တာဝန်ရှိတာပေါ့။
"ဟုတ်တယ် ကိုကံသာ ။ ကျုပ်နဲ့ ငတိုးကျတာ"
အောင်ဘုက ကိုကံသာကို ပြန်ပြောလိုက်တယ်။
"မင်းတို့ ဓါတ်မီးနဲ့ သေသေချာချာ ထိုးကြည့်လိုက်ရဲ့လား"
"ကြည့်လိုက်တယ်ဗျ။ အရူးမဗျ ။ ကိုယ်လုံးတီးနဲ့"
"ဒါဆိုရင် အနောက်ပိုင်းက အရီးမယ်သိန်းသမီး
အရူးမ ထွေးကြည် ဖြစ်မှာပေါ့"
လေးလေးချက်ကြီးက လှမ်းပြောလိုက်တာဗျ။
"ဟာ မဟုတ်ဘူး လေးလေးချက်ကြီးရဲ့။
မထွေးကြည်က ဝဝကြီးပဲဟာ ။ ခုနက တွေ့လိုက်တဲ့
အရူးမဟာ ကိုယ်လုံးကိုယ်ပေါက်က တော်တော်ကို
လှတာဗျ။ မျက်နှာကိုတော့ မမြင်ရဘူး။ လက်ဝါးနှစ်ဖက်နဲ့
အုပ်ထားတယ်။ ဆံပင်ဖားလျားကြီးက ဒူးခေါင်းလောက်ကို
အုပ်နေတာဗျ"
"နေပါဦး အောင်ဘုရဲ့။ ဒီအရူးမက ဘယ်ရောက်သွားတုံး"
ကျုပ်ကလည်း မနေနိုင်တော့ဘဲ ဝင်မေးလိုက်တာဗျို့။
"တာတေလား ။ ငါတို့ကြည့်နေတုန်းကွ ။ တဖြည်းဖြည်းနဲ့
ငါတို့ဆီကို ကပ်လာတာ။ ဒါနဲ့ ငတိုးက သံချောင်းထခေါက်
လိုက်တာဟေ့ ။ သံချောင်းခေါက်သံလည်း ကြားရော
နောက်လှည့်ပြီး ပြေးတော့တာပဲဟေ့။ ဒါပေမဲ့ သူပြေးပုံပဲ
တစ်မျိုးပဲကွ ။ လှစ်ကနဲ လှစ်ကနဲ ရွေ့သွားတာ"
"ဟေ ဘယ်လိုကွ အောင်ဘုရဲ့ ။ ဘယ်လိုပြေးတာတုံး"
"တစ်နေရာကနေ နောက်တစ်နေရာကို လှစ်ကနဲ
လှစ်ကနဲ ရောက်သွားတာကွ ခြေထောက်နဲ့
လျှောက်သွားသလို မဟုတ်ဘူး"
"ဟာ ဒီကောင်နှစ်ကောင် သရဲခြောက်ခံရတာပါကွာ
ဟား ဟား ဟား ဟား ဟား"
ဆယ်အိမ်ခေါင်း ကိုကံသာက ရယ်ပြီးပြောလိုက်ရောဗျို့။
"အေး.…ဖြစ်နိုင်တယ်ကွ"
လေးလေးချက်ကြီးရော တခြားသူတွေရော
တစ်ယောက်တစ်ပေါက်နဲ့ ဝိုင်းပြောပြီး ပြန်လာကြတယ်။
"ကဲ …တခြားကင်းတွေလည်း ပြောလိုက်ကြကွာ။
သရဲမ လာခြောက်ရင် လေးခွနဲ့သာ ပစ်လွှတ်လို့
သံချောင်းခေါက်မနေနဲ့လို့"
ဆယ်အိမ်ခေါင်း ကိုကံသာလည်း အော်ကျယ် အော်ကျယ်
ပြောပြီး ထွက်သွားတယ်။ လူရှင်းသွားတော့မှ အောင်ဘုနှင့်
ငတိုးက ကျုပ်နားကို ရောက်လာပြီး…
"ဟေ့ကောင် တာတေ။ ဒီလူကြီးတွေပြောတာ
မဟုတ်ဘူးကွ ။ ငါနဲ့ ငတိုး သေသေချာချာ မြင်လိုက်တာ
လူမှ လူအစစ်ကွ။ ခြေတွေ လက်တွေဆိုတာ
ဖွေးဆွတ်နေတာ ။ ငါ မင်းကို ရှင်းရှင်းပြောမယ်ကွာ
စောစောက လူတွေများလို့ ငါမပြောတာ။
အရူးမက ငါတို့နားကို ကပ်လာတာ
စကားပြောပြီးတော့ကပ်လာတာကွ"
"ဟေ…ဟုတ်လား ။ သူ ဘာပြောတုံး"
"ကိုကိုတွေ နန်းမှုံကို မှတ်မိသေးလား။ နန်းမှုံကို
ချစ်သေးရဲ့လား ။ နန်းမှုံ လှလားလို့ ပြောပြီး
ကပ်လာတာတွေ တာတေရ"
"ဟေ …ဟုတ်လား ။ မင်းတို့ နှစ်ယောက်လုံး
သေသေချာချာ ကြားတာပေါ့ ဟုတ်လား"
"ဟာ ကြားပါတယ်ဆိုမှ တာတေရာ"
ငတိုးကလည်း ဝင်ပြောတယ်ဗျ။
"ဒါဆိုရင်တော့ သရဲ ဘယ်ဟုတ်မှာတုံး အောင်ဘုရ"
"အေး … အဲဒါကြောင့် ငါတို့ပြောနေတာပေါ့ကွ။
ပြောတဲ့အသံမှ ချိုပြီး ကြည်လင်နေတာ ။
အေး ပြီးတော့ ပြောရဦးမယ်။ ဒီကောင် ငတိုးက
သံချောင်း ထခေါက်တော့ နောက်ဘက်ကို
လှည့်ပြေးတာ ကိုယ်လုံး တော်တော်လှတာကွ။
ဘယ်က အရီးမယ်သိန်းသမီး ဟုတ်ရမှာလဲကွာ။
ကိုယ်လုံးလေးက တကယ်ကို ပန်းပုထုထားတဲ့
ပန်းပုရုပ်ကလေးလိုပဲကွ။ အရီးမယ်သိန်းသမီး
အရူးမ မထွေးကြည်က ဝတုတ်ကြီးဥစ္စာ
ငါတို့က မသိဘဲနေမလားကွ။ဒါကို လူကြီးတွေက
သရဲခြောက်တာပါဆိုပြီး ပေါ့ပေါ့လေး ပြောသွားတာကွ"
"လူကြီးတွေကတော့ ဒီအတိုင်းပဲကွာ။
သူတို့မှာက ဗဟုသုတကလည်း နည်းရှာကြတာကို
အောင်ဘုရဲ့။ ဒါပေမဲ့ မင်းပြောသလိုဆိုရင်
စောင့်ကြည့်ရတော့မှာပဲကွ။ နေပါဦး အောင်ဘုရဲ့။
အဲဒီ အရူးမက ဘယ်ဘက်ကို ထွက်ပြေးသွားတာတုံးကွ"
"ဟာ ဘယ်ဘက်ကိုမှ မပြေးဘူးကွ။ ဟို မန်ကျည်းပင်ကြီး
နောက်ဘက်ဝင်ပြီး ပျောက်သွားတာကွ။ ပြန်ထွက်လာတာ
မတွေ့တော့ဘူး ။ ငါနဲ့ ငတိုးနဲ့ အဲဒီ မန်ကျည်းပင်နောက်ကို
သွားကြည့်ကြသေးတယ်။ ဘာမှ မတွေ့တော့ဘူး တာတေရ"
ကျုပ်က အောင်ဘုကို ခေါင်းညိတ်ပြလိုက်ပြီး
မေးလိုက်တယ်။
"အဲဒီအရူးမက သူ့ကိုယ်သူ နန်းမှုံလို့ ပြောတယ်
ဟုတ်လား အောင်ဘု "
"အေး…ဟုတ်တယ် တာတေ။ အောင်ဘုတင် မဟုတ်ဘူး
ငါလည်း ကြားတာပဲကွ"
ငတိုးကလည်း ဝင်ပြောတယ်။
"ကဲ သူငယ်ချင်းတို့ ငါပြန်မယ်။ ဘာလဲဆိုတာ
သိအောင်တော့ ခဏစောင့်ကြည့်ကြသေးတာပေါ့ကွာ"
ကျုပ်က အောင်ဘုနဲ့ ငတိုးကို နှုတ်ဆက်ပြီး
အိမ်ပြန်လာခဲ့တယ်။ တိုးလှတို့ အောင်သိန်းတို့ဆီကို
မဝင်တော့ဘူး။ အောင်ဘုနဲ့ ငတိုးပြောတာ တော်တော်တော့
ထူးဆန်းသားဗျ။ မနက် အိပ်ရာကနိုးတော့
မနေ့ကကျန်တဲ့ ဝက်သားဟင်းနဲ့
ကျုပ် ထမင်းကြမ်းစားလိုက်တယ်။
ပြီးတော့ ခုံတန်းလေးမှာ ထိုင်ပြီး ရေနွေးကြမ်း
သောက်နေလိုက်တယ်။
"ကိုကြီးတာတေ နိုးပြီလား"
ကျုပ် ဝိုင်းထဲလှမ်းကြည့်လိုက်တော့ ကျောက်ခဲဗျ။
"ဟေ့ကောင် ကျောက်ခဲ လာလေ"
ကျောက်ခဲက အိမ်ပေါ်ကို တက်လာတယ်။
ဒီကောင် ကျုပ်ဘေးမှာ ငြိမ်ငြိမ်လေး ထိုင်တယ်။
"ကျောက်ခဲ တစ်ခုခုတော့ ထူးတယ်ထင်တယ်"
"ဟုတ်တယ်ဗျ ။ ကိုကြီးတာတေရ။
ဒီမနက်ရောက်မှ ရွာထဲမှာ သတင်းတွေ ထွက်လာတာ
ညက အရှေ့ပိုင်းကင်းကိုရော အနောက်ပိုင်းကင်းကိုရော
မြောက်ပိုင်းကင်းကိုရော ကိုအောင်ဘုတို့ပြောတဲ့
အရူးမ လာတယ်တဲ့ဗျ"
"ဟေ ဟုတ်လား။ ဒါဆိုရင် ဒီအရူးမက တစ်ညလုံး
ရွာထဲမှာ လျှောက်သွားနေတာပေါ့"
"ဟုတ်တယ်ဗျ ပြီးတော့ သူတို့ပြောတဲ့အထဲမှာ
ထူးဆန်းတာတစ်ခု ပါနေတယ်ဗျ"
"ဟေ…ဘာထူးဆန်းတာတုံး ကျောက်ခဲရ"
"အဲဒီအရူးမက သစ်ပင်ဖြစ်ဖြစ် တိုင်ဖြစ်ဖြစ်
ကွယ်သွားရင် ပျောက်သွားရောတဲ့ဗျ"
"ဟင် ဆန်းလှချည်လားကွ ကျောက်ခဲရ။
မင်း ဒီအတိုင်း ကြားခဲ့တာလား"
"ဟုတ်တယ် ကိုကြီးတာတေ ။ဒီအကြောင်းကို
ရွာထဲမှာ ဝိုင်းပြောနေကြတာဗျ"
"ဒီည ရွာလယ်ပိုင်းကင်းမှာ ငါ့ကင်းလှည်ကွ
ကျောက်ခဲရ ။ ညကျရင် ငါ သေသေချာချာ
စောင့်ကြည့်ပါ့မယ်ကွာ"
ဒုတိယပိုင်း....ဆက်ရန်
